Raat Hai Ya Hawa Makanon Mein

raat hai yā havā makānoñ meñ

jal rahā hai diyā makānoñ meñ

jaane kyā ho gayā makīnoñ ko

jaane kyā ho gayā makānoñ meñ

log kin vāhimoñ meñ rahte haiñ

kāTte haiñ sazā makānoñ meñ

ik sitāra zamīn par utrā

aur phir kho gayā makānoñ meñ

aisā lagtā hai ḳhvāb kī ta.abīr

dekhtā hai ḳhudā makānoñ meñ

ek saa.e se roz hotā hai

āmnā-sāmnā makānoñ meñ

in sitāroñ kā mashġhala hai ‘rasā’

tāknā-jhāñknā makānoñ meñ

Leave a Comment