yaron ko kya DhunD rahe ho vaqt ki ankh-micholi men
shahar men vo to baTe hue hain apni apni Toli men
shahon jaisa kuchh bhi nahin hai gumbad taaq na mehraben
taj-mahal ka aks na DhunDo meri shikasta kholi men
Dhalte Dhalte suraj ne bhi ham par ye ehsan kiya
chand sitare Daal diye hain raat ki ḳhali jholi men
‘mira-ji’ ke dohe gaao ya ki ‘mir’ ke sher paḌho
dard ke qisse sab ne likhe hain apni apni boli men
atlas aur kamḳhvab ki raunaq is men kahan se paoge
meri ghazal to baiThi hui hai aaj ghamon ki Doli men
Leave a Reply