Faiz Khalilabadi
bhang khate hain na ganja na charas piite hain
ham vo bhanvare hain jo ehsas ka ras piite hain
aap is Dhang se amrit bhi nahin pi sakte
jis hunar-mandi se ham ashk-e-nafas piite hain
sab yahin chhoḌ ke jaana hai ḳhabar hai lekin
phir ye ham kis liye duniya ki havas piite hain
jo tiri yaad ke kiiḌe hain badan ke andar
vo miri ruuh ko khate hain plus piite hain
tab kahin hota hai ik shahd ka chhatta tayyar
an-ginat phulon ka ḳhuun jab ye magas piite hain
aap ik buund bhi pi len to ghashi aa jaa.e
gham ke aansu jo asiran-e-qafas piite hain
‘faiz’ ki fikr ki botal men hai jo zahr-e-suḳhan
dekhna hai ki abhi kitne baras piite hain
Leave a Reply