Obaidullah Aleem
aisi tez hava aur aisi raat nahin dekhi
lekin ham ne maula jaisi zaat nahin dekhi
us ki shan-e-ajib ka manzar dekhne vaala hai
ik aisa khurshid ki jis ne raat nahin dekhi
bistar par maujud rahe aur sair-e-haft-aflak
aisi kisi par rahmat ki barsat nahin dekhi
us ki aal vahi jo us ke naqsh-e-qadam par
sirf zaat ki ham ne al-e-sadat nahin dekhi
ek shajar hai jis ki shakhen phailti jaati hain
kisi shajar men ham ne aisi baat nahin dekhi
ik dariya-e-rahmat hai jo bahta jaata hai
ye shan-e-barkat kisi ke saath nahin dekhi
shahon ki tarikh bhi ham ne dekhi hai lekin
us ke dar ke gadaon vaali baat nahin dekhi
us ke naam pe maren khana ab eazaz hamara
aur kisi ki ye izzat auqat nahin dekhi
sadiyon ki is dhuup chhanv men koi hamen batlae
puuri hui kaun si us ki baat nahin dekhi
ahl-e-zamin ne kaun sa ham par zulm nahin dhaya
kaun si nusrat ham ne us ke haath nahin dekhi
Leave a Reply