harim-e-dil, ki sar-ba-sar jo raushni se bhar gaya
kise ḳhabar, main kin diyon ki raah se guzar gaya
ghubar-e-shahr men use na DhunD jo ḳhizan ki shab
hava ki raah se mila, hava ki raah par gaya
tire navah men raha magar miyan-e-din-o-dil
gajar baja to ji uTha, suni azaan to mar gaya
safed pattharon ke ghar, gharon men tirgi ke gham
hazar gham ka ek ye ki tu bhi be-ḳhabar gaya
nagar hain aftab ke, barahana gumbadon ke sar
saron pe nuur ke kalas, main nuur men utar gaya
Leave a Reply