dukhe dilon pe jo paḌ jaae vo tabib nazar
to bagh-e-dil men bhi aa jaaen andalib nazar
har ek sub.h vazu karti hain miri ankhen
ki shayad aaj to aa jaae vo habib nazar
isi tarah se rah-e-yar ko take jaana
had-e-nazar ko gira degi an-qarib nazar
tu intizar se chhuT kar hai ḳhush magar mujh ko
ghaḌi judai ki aane lagi qarib nazar
bujha do sham-e-mohabbat jala do gulshan-e-ishq
dara sakegi na ashiq ko ye muhib nazar
jamal-o-husn ke qaael hain us ke sab ‘ajmal’
bas ek tum hi yahan rakhte ho ajiib nazar
Leave a Reply