soch apni badal raha huun main
kaf-e-afsos mal raha huun main
jo masarrat ko maat deti hai
fikr men aisi Dhal raha huun main
zulmat-e-shab men raushni ke liye
sham.a ki tarah jal raha huun main
misl-e-gul ḳhush-nasib huun kitna
biich kanTon ke pal raha huun main
atish-e-gham lagi hai siine men
mom jaisa pighal raha huun main
zulm par ehtijaj lazim hai
ḳhuun munh se ugal raha huun main
ye bhi kar-e-jihad hai ‘sahil’
harf-e-haq par aTal raha huun main
Leave a Reply