kaleje karb sahte sahte chhalni ho chuke hain
magar ab kya karen ham is ke aadi ho chuke hain
hamare samne se ishq-o-ulfat ko uTha le
ye qisse ham tak aate aate raddi ho chuke hain
sitam ai gardish-e-dauran kise dukhḌe suna.en
dilasa dene vaale haath miTTi ho chuke hain
to kya pyason ko paani bhi pilane se ga.e ham
to kya ye maan len ham log kuufi ho chuke hain
hamare shahr se mumkin ho to bach kar guzar ja
hamare shahr ke sab log vahshi ho chuke hain
are hairat se kya dekhe hain ankhon ko hamari
ye mashkize to ik muddat se ḳhali ho chuke hain
jo mauzun hain unhen qimat munasib hi milegi
magar saste bikenge vo jo daghi ho chuke hain
hamara naam namon se alag likkhegi duniya
ki ham teri mohabbat men misali ho chuke hain
Leave a Reply