Ye Zulm Hai Ki Mere Shahar Ka Jo Qatil Hai

ye zulm hai ki mire shahar kā jo qātil hai

hazār jaan se vo dostī ke qābil hai

mujhe hī vaar pe laatā hai har zamāne meñ

mujhe batā ye zamāna kahāñ kā aadil hai

lahū aur aag kā dariyā hai mere raste meñ

ki merī zaat hī raste meñ mere haa.il hai

sadāqatoñ se nikhartā hai aadmī kā shu.ūr

sadāqatoñ ko samajhnā bahut hī mushkil hai

maiñ apnī zaat meñ huuñ bahr mujh ko kyā parvā

amīr-e-shahr jo dariyā-dilī pe maa.il hai

mirī zabān se haq baat hī nikaltī hai

ye aur baat ki chhātī pe jabr kī sil hai

hai sarḳhushī kī tamannā bahut mire dil meñ

vo is liye ki ye dil ek dukh-bharā dil hai

Leave a Comment