Poet
ye zulm hai ki mire shahar ka jo qatil hai
hazar jaan se vo dosti ke qabil hai
mujhe hi vaar pe laata hai har zamane men
mujhe bata ye zamana kahan ka aadil hai
lahu aur aag ka dariya hai mere raste men
ki meri zaat hi raste men mere haa.il hai
sadaqaton se nikharta hai aadmi ka shu.ur
sadaqaton ko samajhna bahut hi mushkil hai
main apni zaat men huun bahr mujh ko kya parva
amir-e-shahr jo dariya-dili pe maa.il hai
miri zaban se haq baat hi nikalti hai
ye aur baat ki chhati pe jabr ki sil hai
hai sarḳhushi ki tamanna bahut mire dil men
vo is liye ki ye dil ek dukh-bhara dil hai
Leave a Reply