ki is se pahle ḳhizan ka shikar ho ja.un
saja luun ḳhud ko mukammal bahar ho ja.un
utarne ko pahaḌon se dhuup ghaTi men
main koi chiiḌ koi devdar ho ja.un
nahin huun tujh se main vabasta ai jahan lekin
ye sochta huun ki ab hoshiyar ho ja.un
na bhaa.e log yahan ke na shahr hi ye mujhe
magar main ḳhud se hi kaise farar ho ja.un
bhale hon taish men lahren magar kise parvah
main kuud ja.un to dariya ke paar ho ja.un
koi javab to suraj ke zulm ka bhi ho
main barishon ki jo ThanDi phuvar ho ja.un
Leave a Reply