Waiz-E-Shahr KHuda Hai Mujhe Malum Na Tha

vā.iz-e-shahr ḳhudā hai mujhe ma.alūm na thā

yahī bande kī ḳhatā hai mujhe ma.alūm na thā

ġham-e-daurāñ kā mudāvā na huā par na huā

haath meñ kis ke shifā hai mujhe ma.alūm na thā

naġhma-e-nai bhī na ho bāñg-e-bat-e-mai bhī na ho

ye bhī jiine kī adā hai mujhe ma.alūm na thā

maiñ samajhtā thā jise haikal o mehrāb o kunisht

merā naqsh-e-kaf-e-pā hai mujhe ma.alūm na thā

apne hī saaz kī āvāz par hairāñ thā maiñ

zaḳhma-e-sāz nayā hai mujhe ma.alūm na thā

jis kī iimā pe kiyā shaiḳh ne bandoñ ko halāk

vahī bandoñ kā ḳhudā hai mujhe ma.alūm na thā

ḳhutba tarġhīb-e-halākat kā ravā hai ai dost

sher kahne kī sazā hai mujhe ma.alūm na thā

shab-e-hijrāñ kī darāzī se pareshān na thā

ye tirī zulf-e-rasā hai mujhe ma.alūm na thā

vo mujhe mashvara-e-tark-e-vafā dete the

ye mohabbat kī adā hai mujhe ma.alūm na thā

chehra khole nazar aatī thī urūs-e-gul-nār

muñh pe shabnam kī ridā hai mujhe ma.alūm na thā

kufr o īmāñ kī hadeñ kis ne ta.ayyun kī thiiñ

is pe hañgāma bapā hai mujhe ma.alūm na thā

yahī mār-e-do-zabāñ merā lahū chaaT gayā

rahnumā ek balā hai mujhe ma.alūm na thā

ajab andāz se thā koī ġhazal-ḳhvāñ kal raat

‘ābid’-e-sho.ala-navā hai mujhe ma.alūm na thā

Leave a Comment