va.iz-e-shahr ḳhuda hai mujhe ma.alum na tha
yahi bande ki ḳhata hai mujhe ma.alum na tha
gham-e-dauran ka mudava na hua par na hua
haath men kis ke shifa hai mujhe ma.alum na tha
naghma-e-nai bhi na ho bang-e-bat-e-mai bhi na ho
ye bhi jiine ki ada hai mujhe ma.alum na tha
main samajhta tha jise haikal o mehrab o kunisht
mera naqsh-e-kaf-e-pa hai mujhe ma.alum na tha
apne hi saaz ki avaz par hairan tha main
zaḳhma-e-saz naya hai mujhe ma.alum na tha
jis ki iima pe kiya shaiḳh ne bandon ko halak
vahi bandon ka ḳhuda hai mujhe ma.alum na tha
ḳhutba targhib-e-halakat ka rava hai ai dost
sher kahne ki saza hai mujhe ma.alum na tha
shab-e-hijran ki darazi se pareshan na tha
ye tiri zulf-e-rasa hai mujhe ma.alum na tha
vo mujhe mashvara-e-tark-e-vafa dete the
ye mohabbat ki ada hai mujhe ma.alum na tha
chehra khole nazar aati thi urus-e-gul-nar
munh pe shabnam ki rida hai mujhe ma.alum na tha
kufr o iman ki haden kis ne ta.ayyun ki thiin
is pe hangama bapa hai mujhe ma.alum na tha
yahi mar-e-do-zaban mera lahu chaaT gaya
rahnuma ek bala hai mujhe ma.alum na tha
ajab andaz se tha koi ghazal-ḳhvan kal raat
‘abid’-e-sho.ala-nava hai mujhe ma.alum na tha
Leave a Reply