Agar Wo Apne Hasin Chehre Ko Bhul Kar Be-Naqab Kar De

agar vo apne hasin chehre ko bhuul kar be-naqab kar de

to zarre ko mahtab aur mahtab ko aftab kar de

tiri mohabbat ki vadiyon men miri javani se duur kya hai

jo saada paani ko ik nashili nazar men rangin sharab kar de

harim-e-ishrat men sone vaale shamim-e-gesu ki mastiyon se

miri javani ki saada raton ko ab to sarshar khvab kar de

maze vo paae hain aarzu men ki dil ki ye aarzu hai yarab

tamam duniya ki arzuen mire liye intikhab kar de

nazar na aane pe hai ye halat ki jang hai shaikh-o-barahman men

khabar nahin kya se kya ho duniya jo khud ko vo be-naqab kar de

mire gunahon ki shorishen is liye ziyada rahi hain yarab

ki in ki gustakhiyon se tu apne afv ko be-hisab kar de

khuda na laae vo din ki teri sunahri nindon men farq aae

mujhe to yuun apne hijr men umr bhar ko bezar-e-khvab kar de

main jan-o-dil se tasavvur-e-husn-e-dost ki mastiyon ke qurban

jo ik nazar men kisi ke be-kaif ansuon ko sharab kar de

urus-e-fitrat ka ek khoya hua tabassum hai jis ko ‘akhtar’

kahin vo chahe sharab kar de kahin vo chahe shabab kar de

Leave a Comment