andesha-e-arbab-e-haram saath rahega
jannat bhi milegi to ye gham saath rahega
pyase hi guzar jaenge ham rah-e-talab se
ibrat ke liye saghar-e-jam saath rahega
manzil se palat aaegi ek ek tajalli
haan shoala-e-rukhsar-e-sanam saath rahega
tu aur na aae dar-e-zindan-e-vafa tak
mar kar bhi ye gham teri qasam saath rahega
aflak se palkon pe utar aenge taare
khul kar bhi shab-e-gham ka bharam saath rahega
mai-khana bahut duur nahin dida-e-nam se
aa gardish-e-dauran koi dam saath rahega
rahon men ‘qatil’ aenge sau aina-khane
lekin mira gul-posh qalam saath rahega
Leave a Reply