Majeed Amjad
mahakte miThe mastane zamane
kab a.enge vo man-mane zamane
jo mere kunj-e-dil men gunjte hain
nahin dekhe vo duniya ne zamane
tiri palkon ki jumbish se jo Tapka
usi ik pal ke afsane zamane
tiri sanson ki saughaten baharen
tiri nazron ke nazrane zamane
kabhi to meri duniya se bhi guzro
liye ankhon men anjane zamane
unhi ki zindagi jo chal paḌe hain
tiri maujon se Takrane zamane
main fikr-e-raz-e-hasti ka parastar
miri tasbih ke daane zamane
Leave a Reply