kab vo bhala hamari mohabbat men aa gae
haae vo log jo ki zarurat men aa gae
vaise to un ko saae se uljhan bala ki thi
momi badan the dhuup ki nafrat men aa gae
reza vajud mera abhi tak hava men hai
tum to qarib mere shararat men aa gae
kuchh to hamen bhi jagte rahne ka shauq tha
kuchh ratjage bhi khvab ki qimat men aa gae
avaz de raha hai abhi kuza-gar mujhe
yuun lag raha hai chaak se ujlat men aa gae
yadon ke is hujum se fursat nahin hamen
tujh se bichhad ke kaisi ye fursat men aa gae
ab aankh se pila do mire yaar zindagi
ki khal-o-khad ke paar to vahshat men aa gae
yaani hamare naam ki shohrat hai auj par
yaani faqih-e-shahr ki tohmat men aa gae
bhaai sabhi pasand ki shadi ke haq men the
bahnon ne khvab dekhe to ghairat men aa gae
shahi mizaj rakhte hain munsif sabhi yahan
‘babar’ ye kis tarah ki adalat men aa gae
Leave a Reply