Fitrat Ansari
daman-e-husn men har ashk-e-tamanna rakh do
diin ki raah men hangama-e-duniya rakh do
zulm ke samne iḳhlas ka parda rakh do
nok-e-har-ḳhar pe barg-e-gul-e-ra.ana rakh do
apni tariḳh ke auraq ulaTna hain agar
gulshan-e-aish pe tapta hua sahra rakh do
jis se vabasta rahe Dubne vaale ki umiid
ek tinka hi sahi tum lab-e-dariya rakh do
tum jo chaho ki mire lab bhi na khulne paa.en
mere aage miri taqdir ka chehra rakh do
roz-e-raushan ki tarah hongi munavvar raten
chand sho.ale jo sar-e-bazm-e-tamanna rakh do
ek avaz si aati hai haram se shayad
mai-kade vaalo zara saghar-o-mina rakh do
Leave a Reply