jazb-e-ulfat ne dikhaya asar apna ulta
aah jab honthon par aai to kaleja ulta
rat-bhar baithe rahe muntazari men us ki
subh jab ho gai hasrat se bichhauna ulta
haq-ba-janib hai agar ham se vo mahvash phir jaae
chalan aflak ka aundha hai zamana ulta
ja-e-hairat hai jo nafrat na ho khud-bini se
nazar aata hai is aine men chehra ulta
zinat-e-rang-e-baqa chahte hain naqsh-e-fana
us muraqqe ka dikhai diya naqsha ulta
malgaji chadar-e-mahtab nazar aane lagi
us ne chehre se jo sote men dupatta ulta
ab to yaron se bhi yaari ki tavaqqoa na rahi
hal-pursi ke evaz karte hain shikva ulta
qufl darvaze men kyuun aaj nazar aata hai
kaun jhanka tumhen kis shakhs ne parda ulta
mar gaya main jo mujhe pyaar se maara us ne
sidhi talvar hua us ka tamancha ulta
mai-kada chhod ke kyuun khum men falatun baitha
aisi hi aql ne yunan ka takhta ulta
maraz-e-ishq men aram kisi taur nahin
kabhi sidha jo dam aaya to kaleja ulta
phir ulat kar na khabar li hue aise ghafil
ab to aao ki main dam leta huun ulta ulta
na to vo phuul na kaliyan na vo sabza na bahar
rut ki phirti hai chaman-zar ka takhta ulta
ek jalva to bhala aur bhi vaqt-e-rukhsat
bahr-e-gul bad-e-bahari koi jhonka ulta
‘bahr’ kya kucha-e-janan se phire ghar ki taraf
kabhi dekha nahin bahte hue dariya ulta