us ko mere afsane men kya jaane kya baat mili
chand se ruḳh par gham ke badal ankhon men barsat mili
bas itni si baat thi us ki zulf zara lahra.i thi
ḳhauf-zada har shaam ka manzar sahmi si har raat mili
daulat aur shohrat logon ne qismat se aage paa.i
aur musibat bhi ham ko to bas hasab-e-auqat mili
vo jis ko kuchh fikr nahin hai har gham se anjan hai jo
pag-pag us ki rahguzar men ashkon ki barat mili
sab ummiden TuuT chuki thiin dil tha mahv-e-yas ‘aqil’
aur daman tha purze purze jab ham ko ḳhairat mili
Leave a Reply