aur bhi ho gae begana vo ghaflat kar ke
azmaya jo unhen zabt-e-mohabbat kar ke
dil ne chhoda hai na chhode tire milne ka khayal
bar-ha dekh liya ham ne malamat kar ke
dekhne aae the vo apni mohabbat ka asar
kahne ko ye hai ki aae hain ayadat kar ke
pasti-e-hausla-e-shauq ki ab hai ye salah
baith rahiye gham-e-hijran pe qanaat kar ke
dil ne paaya hai mohabbat ka ye aali rutba
aap ke dard-e-dava-kar ki khidmat kar ke
ruuh ne paai hai taklif-e-judai se najat
aap ki yaad ko sarmaya-e-rahat kar ke
chhed se ab vo ye kahte hain ki sambhlo ‘hasrat’
sabr o tab-e-dil-e-bimar ko gharat kar ke
Leave a Reply