main jis ke saath ‘zafar’ umr bhar uTha baiTha
vo jaane aaj hai kyuun ajnabi bana baiTha
shikayat us se nahin apne-ap se hai mujhe
vo bevafa tha to main aas kyuun laga baiTha
jo mere vaste buniyad tha mohabbat ki
main us ḳhayal ki divar hi gira baiTha
buland parcham-e-azm-e-safar main kya rakhta
mire qarib hi mera ghubar aa baiTha
sama.aton ki fasilon pe aisa pahra tha
ki phaḌphaḌata hua ta.ir-e-sada baiTha
mila vo raat mujhe mahfil-e-masarrat men
to main adab se nahin dukh se duur ja baiTha
‘zafar’ batao use haath kya laga sakta
jise main dekh ke bina.i hi ganva baiTha
Leave a Reply