Dil Ka Bura Nahin Magar shaKHs Ajib Dhab Ka Hai

Shahzad Ahmad

dil ka bura nahin magar shaḳhs ajiib Dhab ka hai

mujh se hai ḳhaas dushmani vaise to yaar sab ka hai

duriyon ne miTa diye jo bhi the qurbaton ke ranj

ab miri baat baat men rang tiri talab ka hai

mere lahu men thi ravan jab tire saans ki mahak

jaane ye kab ki baat hai jaane ye zikr kab ka hai

ek zara si baat par badli thi jab tiri nazar

tujh ko ḳhabar nahin magar dil to udaas tab ka hai

kyuun na dil-e-ḳhizan-nasib har gul-e-tar ko chuum le

aaj to phuul phuul men za.iqa us ke lab ka hai

kaif-o-nashat-o-sar-ḳhushi nematen sab usi ki hain

mujh ko ata kiya hua dard bhi mere rab ka hai

shaukat-o-shan-e-izdi dil ne kahan se siikh li

sab se hai be-niyaz bhi dhyan bhi us ko sab ka hai

raah dikha.i tak na di tira-shabi bala ki thi

aankh na khul saki miri nuur bhi is ghazab ka hai

hashr ka din bhi ho to kya ye bhi nasib hai mira

din hai guzar hi ja.ega ḳhauf to mujh ko shab ka hai