Waseem Barelvi
vo mere ghar nahin aata main us ke ghar nahin jaata
magar in ehtiyaton se ta.alluq mar nahin jaata
bure achchhe hon jaise bhi hon sab rishte yahin ke hain
kisi ko saath duniya se koi le kar nahin jaata
gharon ki tarbiyat kya aa ga.i T-v ke hathon men
koi bachcha ab apne baap ke uupar nahin jaata
khule the shahr men sau dar magar ik had ke andar hi
kahan jaata agar main lauT ke phir ghar nahin jaata
mohabbat ke ye aansu hain unhen ankhon men rahne do
sharifon ke gharon ka mas.ala bahar nahin jaata
‘vasim’ us se kaho duniya bahut mahdud hai meri
kisi dar ka jo ho jaa.e vo phir dar dar nahin jaata
Leave a Reply