Moosa Raza
na vo hijr men rahin talḳhiyan na vo lazzaten hain visal men
na guzar tira mire ḳhvab men na main gum huun tere ḳhayal men
na tiri ada men vo dilkashi na miri ghazal men vo tazgi
vo ghubar-e-vaqt men dab ga.i jo kashish thi husn-o-jamal men
main tiri jafa se ḳhafa nahin mujhe tujh se koi gila nahin
mujhe fikr kya hai ma.aal ki tujhe kya mila hai vabal men
na vo ah-e-gham na vo chashm-e-nam na vo laghzishen hain qadam qadam
na vo kashmakash hai javab men na vo valvale hain saval men
mujhe koi fikr-e-asas hai na ḳhayal-e-hosh-o-havas hai
dam-e-zindagi ka hiras hai na tamiz hai mah-o-sal men
Leave a Reply