Rahat Indori
saath manzil thi magar khauf-o-khatar aisa tha
umr-bhar chalte rahe log safar aisa tha
jab vo aae to main khush bhi hua sharminda bhi
meri taqdir thi aisi mira ghar aisa tha
hifz thiin mujh ko bhi chehron ki kitaben kya kya
dil shikasta tha magar tez nazar aisa tha
aag odhe tha magar baant raha tha saaya
dhuup ke shahr men ik tanha shajar aisa tha
log khud apne charaghon ko bujha kar soe
shahr men tez havaon ka asar aisa tha
Leave a Reply