Ba-Zahir Us Ka Qad Uncha Bahut Hai

ba-zāhir us kā qad ūñchā bahut hai

magar andar se vo chhoTā bahut hai

jahannum kī zarūrat kyā hai āḳhir

azāboñ ko to ye duniyā bahut hai

baḌe iḳhlās se miltā hai mujh se

mujhe us shaḳhs se ḳhadsha bahut hai

zarā sā chhāñv thoḌā sā ujālā

hamāre vāste itnā bahut hai

havas ko kam haiñ asbāb-e-do-ālam

qanā.at ke liye thoḌā bahut hai

tire ash.ār jaise bhī haiñ ‘rāhī’

magar lahja tirā tīkhā bahut hai

Leave a Comment