Aa Dil Mein Tujhe Kahin Chhupa Lun

aa dil meñ tujhe kahīñ chhupā luuñ

logoñ kī nigāh se bachā luuñ

kyuuñ tujh pe gumān-e-be-vafā.ī

kyuuñ apne hī dil kī bad-duā luuñ

tujh sā koī dūsrā nahīñ hai

chāhe to tirī qasam uThā luuñ

dīvār-e-ummīd Dhe rahī hai

tasvīr tirī kahāñ lagā luuñ

ā.īne kī dhund saaf kar ke

kyuuñ ḳhud ko na hāl-e-dil sunā luuñ

kaTte hī nahīñ pahāḌ se din

‘shohrat’ maiñ use kahāñ se pā luuñ

Leave a Comment