Wafa Ka Zikr Hi Kya Hai Jafa Bhi Ras Aae

Shaz Tamkanat

vafa ka zikr hi kya hai jafa bhi raas aa.e

vo muskura.e to jurm-e-ḳhata bhi raas aa.e

vatan men rahte hain ham ye sharaf hi kya kam hai

ye kya zarur ki ab-o-hava bhi raas aa.e

hatheliyan hain tiri lauh-e-nur ki manind

ḳhuda kare tujhe rang-e-hina bhi raas aa.e

dava to ḳhair hazaron ko raas aa.egi

maza to jiine ka jab hai shifa bhi raas aa.e

to phir ye aadmi ḳhud ko ḳhuda samajhne lage

agar ye umr-e-gurezan zara bhi raas aa.e

ab is qadar bhi na kar justaju-e-ab-e-baqa

gul-e-hunar hai to bad-e-fana bhi raas aa.e

ye tera rang-e-suḳhan tera bankpan ai ‘shaz’

ki sher raas to aa.e ana bhi raas aa.e