Anjum Saleemi
ḳhud apne haath se kya kya hua nahin mire saath
main kya kahun mira kuchh bhi gila nahin mire saath
main us ke saath huun be-shak main us ke paas nahin
vo mere paas tha lekin vo tha nahin mire saath
nikal paḌa huun kisi ko mile bata.e baghair
safar ba-ḳhair koi bhi dua nahin mire saath
vo mere dukh men mara ja raha hai hairat hai
jo ek din bhi ḳhushi se jiya nahin mire saath
ḳhuda ki raah men nikla huun main tan-e-tanha
ye pahli baar hua hai ḳhuda nahin mire saath
Leave a Reply