qasid-e-khush-fal laaya us ke aane ki khabar
dil to khush karta hai baare ye bahane ki khabar
vo but-e-be-raham ham se yuun judai kar gaya
haae kis kafir ko thi is bad zamane ki khabar
bulbulo do din ghanimat hai ye fursat aish ki
baagh se hai aaj kal hi gul ke jaane ki khabar
ta-abad khali rahe ya-rab dilon men us ki ja
jo koi laave mire ghar us ke aane ki khabar
mere dil ko nisbat-e-farhad-o-majnun aar hai
duur ho mujh ko nahin hai is divane ki khabar
kaun kis ki ishq ke zindan men gham-khvari kare
khun-e-dil leta hai mere piine khane ki khabar
aa gaya nadan tu us ke fareb-e-lutf men
mujh ko ‘hasrat’ sab thi us ke dil lubhane ki khabar
Leave a Reply