ruuh ko qalib ke andar janna mushkil hua
lafz men ehsas ko pahchanna mushkil hua
le udi patte hava to shakh-e-gul be-bas hui
phuul par saae ki chadar tanna mushkil hua
apne khalvat-khana-e-dil se jo nikle to hamen
sab ke gham men apna gham bhi janna mushkil hua
vaqt ne jab aaina ham ko dikhaya ro pade
apni surat aap hi pahchanna mushkil hua
is mashini-ahd men kya zaat kya irfan-e-zat
aadmi ko aadmi gardanana mushkil hua
justuju-e-laal-o-gauhar se bhi baaz aae vo log
khirman-e-khashak jin se chhanna mushkil hua
dil na chhota kijiye na-qadri-e-ahbab par
aib-juyon ko hunar pahchanna mushkil hua
kya karen ‘javed’ is bahrupiyon ke daur men
gul ko gul kante ko kanta manna mushkil hua
Leave a Reply