Nihal Sevharvi
vaah fusun-e-ab-o-gil
dahr hai ik rangin mahfil
razm-kunan rah-e-tufan se
mil hi ja.ega sahil
kis ki mahfil ko dekhen
ham tum hain ḳhurak-e-mahfil
josh-e-amal ki ḳhami ka
naam jahan men hai mushkil
surḳh na ho kyuun ashk-e-gham
ḳhun-e-jigar bhi hai shamil
yuun na fasurda-ḳhatir rah
ghuncha-o-gul ki surat khil
dekh tilism-e-fikr-e-‘nihal’
sehr-bayan sha.ir se mil
Leave a Reply