mila to de ke juda.i chala gaya aḳhir
hamare hisse men tanha safar raha aḳhir
agar ye tai tha ki har baat se mukarna hai
to saath dene ka va.ada hi kyon kiya aḳhir
use ḳhayal tha kitna jahan valon ka
isi ḳhayal men jaan se guzar gaya aḳhir
tazad-e-fikr ka ilzam kuchh durust nahin
kaha tha main ne jo avval vahi kaha aḳhir
vo mere dard mire gham ko banTne vaala
ik aur karb mujhe daan kar gaya aḳhir
tumhen yaqin tha ham dosti nibha lenge
hamen guman tha jis ka vahi hua aḳhir
faraz-e-dar se pahle ka vaqt mushkil tha
kisi ki yaad ke saa.e men kaT gaya aḳhir
jab iḳhtiyar tha tum faisla suna dete
tamam umr tazabzub men kyon rakkha aḳhir
main us ke haath se nikla hua zamana tha
vo meri khoj men nikla bikhar gaya aḳhir
main e’tibar ki duniya se kaT gaya ‘anvar’
kisi ke saath main itna bhi kyon chala aḳhir
Leave a Reply