Aslam Mahmood
jal raha huun to ajab rang o saman hai mera
asman jis ko samajhte ho dhuan hai mera
le ga.i bandh ke vahshat use sahra ki taraf
ek dil hi to tha ab vo bhi kahan hai mera
dekh le tu bhi ki ye aḳhiri manzar hai mira
jis ko kahte hain shafaq rang-e-ziyan hai mera
apna hi zor-e-tanaffus na miTa de mujh ko
in dinon zad pe miri ḳhema-e-jan hai mera
zarra-e-ḳhak bhi hota hai kabhi bar-e-giran
kabhi lagta hai ki ye saara jahan hai mera
ab ufuq-ta-ba-ufuq men huun har a.ine men
jaise har samt o jihat aks-e-ravan hai mera
ruk gaya aa ke jahan qafila-e-rang-o-nashat
kuchh qadam aage zara baḌh ke makan hai mera
Leave a Reply