Asra Rizvi
be-sabab ḳhauf se dil mera larazta kyuun hai
bat-be-bat yunhi ḳhud se ulajhta kyuun hai
shor aise na kare bazm men ḳhamosh rahe
ik tavatur se ḳhuda jaane dhaḌakta kyuun hai
mom ka ho ke bhi patthar ka bana rahta tha
ab ye jazbat ki hiddat se pighalta kyuun hai
hijr ke jitne bhi mausam the vo kaaTe hans kar
phir sar-e-sham hi yadon men sisakta kyuun hai
us ke hone se main inkar karun to kaise
aks us ka miri ankhon men jhalakta kyuun hai
jab bhi ḳhamoshi se tanha.i men baiThi ja kar
karb sa us ki rifaqat ka chhalakta kyuun hai
phuuT jaa.e ye kisi taur koi Thes lage
ban ke phoḌa sa vo ab dil men Tapakta kyuun hai
jo muqaddar men likha tha vo hua hai ‘asra’
ḳhvab ki baton se is tarah machalta kyuun hai
Leave a Reply