ziist men rang bhar ga.i aḳhir
vo nazar kaam kar ga.i aḳhir
jazb-e-vahshat ki karsazi se
dil ki qismat sanvar ga.i aḳhir
chiir kar parda-e-mah-o-anjum
aap hi par nazar ga.i aḳhir
jo qayamat guzarni thi ham par
dil ke hathon guzar ga.i aḳhir
haa.e vo ik nigah-e-duzdida
kya kya ilzam dhar ga.i aḳhir
jo ḳhalish dil men thi nihan pahle
rag-o-pai men utar ga.i aḳhir
azm-e-taban se bar-sar-e-manzil
raushni si bikhar ga.i aḳhir
soz-e-dil ke tufail ai ‘mansha’
sha.iri bhi nikhar ga.i aḳhir
Leave a Reply