mujhe puchha hai aa kar tum ne us aḳhlaq-e-kamil se
ki main sharminda ho kar rah gaya andaza-e-dil se
nazar ke ruḳh ko ya to dil ki janib pher lene do
nahin to samne aa jaao uTh kar parda-e-dil se
umiden uTh rahi hain saikḌon ummidvaron ki
main tanha huun magar tanha nahin uTThunga mahfil se
amir-e-karvan jis raushni ke bal pe baḌhta hai
nikalta hai vo taara sub.h hote ḳhak-e-manzil se
unhen duniya ab ashk-e-gham kahe ya ḳhuun ki bunden
mohabbat ne charagh ankhon men la kar rakh diye dil se
ab us nang-e-mohabbat se kinara bhi to mushkil hai
mujhe jis ki mohabbat ka yaqin aaya tha mushkil se
abhi to shaam hai aghaz hai parvana-sozi ka
koi is sham.a ko agah kar do sub.h-e-mahfil se
abhi tahqiq behtar hai ki phir shikva abas hoga
ki mir-e-karvan vaqif nahin adab-e-manzil se
miTane se kabhi naqsh-e-mohabbat miT nahin sakta
mira afsana niklega tiri rudad-e-mahfil se
ghanimat hai nazar raushan hai dil ab tak dhaḌakta hai
mohabbat men to ye asaniyan milti hain mushkil se
ufuq ke aa.ine men ho na ho dhare ke saa.e men
nazar aati hain tufanon ki sarhad jaise sahil se
tira jalva to kya tu ḳhud bhi tafrih-e-nazar hota
miri ankhon ne ab tak bhiik mangi hi nahin dil se
sitam ki aḳhiri manzil pe iz.har-e-pashemani
nikal aate hain aansu yuun to har dukhte hue dil se
main ik zarra huun lekin vus.at-e-sahra se vaqif huun
uTha sakta nahin ḳhud mir-e-mahfil mujh ko mahfil se
tahayya kar liya tang aa ke go tark-e-ta.alluq ka
magar ab fikr hai ye ḳhat unhen likkhenge kis dil se
mujhe ‘ehsan’ mere qafile valon ne ab samjha
ki ye zarra sitara ban gaya taqdir-e-manzil se
Leave a Reply