mariz-e-ishq ka bahut ajiib haal ho gaya
ajiib haal ho gaya to phir visal ho gaya
vo kah raha tha zindagi guzarna muhal hai
vo ab ye kah raha hai yaar kya kamal ho gaya
main shiddat-e-bayan se nikal sakun to phir kahun
ye mera lahja-e-sukut be-misal ho gaya
bahut hua to ye hua fareb-e-arzu yahan
talab ke aa.ine pe aks-e-pur-jamal ho gaya
hai aaj bhi vo muntazir tiri nigah-e-naz ka
jo sabza tere raste men pa.emal ho gaya
main daman-e-tahi se tum ko yaad karne baiThi jab
ḳhazana-e-ḳhayal mera mala-mal ho gaya
Leave a Reply