Zakia Ghazal
bas ik zara ḳhayal hamen dosti ka hai
varna bahut malal tiri be-ruḳhi ka hai
tu bhi hai zindagi men kahin hai mujhe yaqin
ya ye bhi ehtimal miri sadgi ka hai
hai aaj jism-o-jan pe tiri yaad ki thakan
ik ḳhauf mere dil ko kisi an-kahi ka hai
vaqif huun tere dard se lekin mire habib
ab to ye mas.ala bhi miri zindagi ka hai
lab hain ḳhamosh zabt se lekin ye mas.ala
ankhon men teri yaad se phaili nami ka hai
rishton ke darmiyan bahut mutma.in huun main
is zindagi men dard to teri kami ka hai
ye din ye shab ye phuul se mausam tire baghair
kaise guzar rahe hain gila bas isi ka hai
Leave a Reply