Kashif Rafiq
main udas-rat ka chand huun ghane badalon men ghira hua
miri taab ki ho ḳhabar kise main rida-e-gham men chhupa hua
nahin phuul main ki miri taraf kisi ḳhush-nazar ki nigah ho
main to ek zard sa paat huun kahin raste men paḌa hua
mujhe Dar tha jis ka vahi hua miri aankh khulte hi jhaḌ gaya
tiri palkon par mire vasl ka tha jo ek ḳhvab saja hua
miri dhaḌkanen thiin baḌhi hui mire honT jaise sile hue
main bayan haal na kar saka tire samne mujhe kya hua
ye adavaton ki subuk hava use sah sakun kahan hausla
main vo peḌ huun ki mohabbaton ki faza men phula-phala hua
ye dayar-e-dil ye khanDar sahi magar is ki raunaqen kam nahin
yahan rang rang ke zaḳhmon ka shab-o-roz mela laga hua
Leave a Reply