vo kab ke aae bhi aur gae bhi nazar men ab tak sama rahe hain
ye chal rahe hain, vo phir rahe hain, ye aa rahe hain vo ja rahe hain
vahi qayamat hai qadd-e-bala vahi hai surat, vahi sarapa
labon ko jumbish, nigah ko larzish, khade hain aur muskura rahe hain
vahi latafat, vahi nazakat, vahi tabassum, vahi tarannum
main naqsh-e-hirman bana hua tha vo naqsh-e-hairat bana rahe hain
khiram rangin, nizam rangin, kalam rangin, payam rangin
qadam qadam par, ravish ravish par nae nae gul khila rahe hain
shabab rangin, jamal rangin, vo sar se pa tak tamam rangin
tamam rangin bane hue hain, tamam rangin bana rahe hain
tamam raanaiyon ke mazhar, tamam ranginiyon ke manzar
sambhal sambhal kar simat simat kar sab ek markaz par aa rahe hain
bahar-e-rang-o-shabab hi kya sitara o mahtab hi kya
tamam hasti jhuki hui hai, jidhar vo nazren jhuka rahe hain
tuyur sarshar-e-saghar-e-mul halak-e-tanvir-e-lala-o-gul
sab apni apni dhunon men mil kar ajab ajab giit ga rahe hain
sharab aankhon se dhal rahi hai, nazar se masti ubal rahi hai
chhalak rahi hai uchhal rahi hai, piye hue hain pila rahe hain
khud apne nashshe men jhumte hain, vo apna munh aap chumte hain
kharab-e-masti bane hue hain, halak-e-masti bana rahe hain
faza se nashsha baras raha hai, dimagh phulon men bas raha hai
vo kaun hai jo taras raha hai? sabhi ko mai-kash pila rahe hain
zamin nashsha, zaman nashsha, jahan nashsha, makan nashsha
makan kyaa? la-makan nashsha, dubo rahe hain pila rahe hain
vo ru-e-rangin o mauja-e-yam ki jaise daman-e-gul pe shabnam
ye garmi-e-husn ka hai alam, araq araq men naha rahe hain
ye mast bulbul bahak rahe hain, qarib-e-ariz chahak rahe hai
gulon ki chhati dhadak rahi hai, vo dast-e-rangin badha rahe hain
ye mauj-o-dariya, ye reg-o-sahra ye ghuncha-o-gul, ye mah-o-anjum
zara jo vo muskura diye hain vo sab ke sab muskura rahe hain
faza ye naghmon se bhar gai hai ki mauj-e-dariya thahar gai hai
sukut-e-naghma bana hua hai, vo jaise kuchh gunguna rahe hain
ab aage jo kuchh bhi ho muqaddar, rahega lekin ye naqsh dil par
ham un ka daman pakad rahe hain, vo apna daman chhuda rahe hain
ye ashk jo bah rahe hain paiham, agarche sab hain ye hasil-e-gham
magar ye maalum ho raha hai, ki ye bhi kuchh muskura rahe hain
zara jo dam bhar ko aankh jhapki, ye dekhta huun nai tajalli
tilism surat mita rahe hain, jamal maani bana rahe hain
khushi se labrez shash-jihat hai, zaban par shor-e-tahniyat hai
ye vaqt vo hai ‘jigar’ ke dil ko vo apne dil se mila rahe hain
Leave a Reply