Mansoor Khushtar
aap ko mujh se mohabbat bhi nahin
aur ”nahin” kahne ki jur.at bhi nahin
jaate hain mahfil se meri ja.iye
rokna kuchh meri fitrat bhi nahin
munhasir jis pe ho meri zindagi
tu ne ki aisi mohabbat bhi nahin
bevafa ki ham-rahi se fa.eda?
aur ab chalne ki himmat bhi nahin
jo kabhi divar pe laTka.i thi
ab tire kamre ki zinat bhi nahin
main kisi ko chhoḌ duun tere liye
tujh se kuchh aisi to qurbat bhi nahin
‘ḳhushtar’ is mehndi lage hathon ki ab
jaane kyuun pahli si rangat bhi nahin
Leave a Reply