Retili Kitni Hawa Hai Ird-Gird

retīlī kitnī havā hai ird-gird

har nazar ik aa.ina hai ird-gird

hasratoñ kī sarzamīñ ḳhūñrez hai

ḳhvāhishoñ kī karbalā hai ird-gird

ik haqīqat haiñ mirī tanhā.iyāñ

ek ehsās-e-ḳhudā hai ird-gird

zindagī kachchā ghaḌā duniyā chanāb

tez-rau paanī chalā hai ird-gird

kyā ḳhabar kab kaun jiinā chhoḌ de

taak meñ kis kī qazā hai ird-gird

jitnī būḌhī ho ga.iiñ socheñ mirī

utnā ziyāda bachpanā hai ird-gird

dhuul hai bas dhuul ‘zīshāñ’ chār-samt

ek be-rasta dishā hai ird-gard

Leave a Comment