retili kitni hava hai ird-gird
har nazar ik aa.ina hai ird-gird
hasraton ki sarzamin ḳhunrez hai
ḳhvahishon ki karbala hai ird-gird
ik haqiqat hain miri tanha.iyan
ek ehsas-e-ḳhuda hai ird-gird
zindagi kachcha ghaḌa duniya chanab
tez-rau paani chala hai ird-gird
kya ḳhabar kab kaun jiina chhoḌ de
taak men kis ki qaza hai ird-gird
jitni buḌhi ho ga.iin sochen miri
utna ziyada bachpana hai ird-gird
dhuul hai bas dhuul ‘zishan’ char-samt
ek be-rasta disha hai ird-gard
Leave a Reply