haft aflak se aage kahin kuchh ho to kahun
had-e-idrak se aage kahin kuchh ho to kahun
main ne jis zaat ko labbaik kaha hai us ke
jalva-e-pak se aage kahin kuchh ho to kahun
jis pe paivand hi paivand nazar aate the
aisi poshak se aage kahin kuchh ho to kahun
mujh se puchhe koi insan kahan tak pahuncha
azm-e-bebak se aage kahin kuchh ho to kahun
haan miri ziist ka hasil gham-e-dauran to nahin
chashm-e-namnak se aage kahin kuchh ho to kahun
jis taraf dekhiye virani hi virani hai
khas-o-khashak se aage kahin kuchh ho to kahun
har taraf ham-vatanon khun-kharabe ke siva
chashm-e-saffak se aage kahin kuchh ho to kahun
alam-e-khak miri zaat ka har zarra hai
alam-e-khak se aage kahin kuchh ho to kahun
mere aflak se aage to faqat huun main hi
mere aflak se aage kahin kuchh ho to kahun
jaan ka hai apni jagah ek tasavvur ‘rumi’
jasad-e-khak se aage kahin kuchh ho to kahun