Sulh Ke Baad Mohabbat Nahin Kar Sakta Main

sulh ke ba.ad mohabbat nahīñ kar saktā maiñ

muḳhtasar ye ki vazāhat nahīñ kar saktā maiñ

dil tire hijr meñ sarshār huā phirtā hai

ab kisī dasht meñ vahshat nahīñ kar saktā maiñ

mere chehre pe haiñ āñkheñ mire siine meñ hai dil

is liye terī hifāzat nahīñ kar saktā maiñ

har taraf tū nazar aatā hai jidhar jaatā huuñ

tere imkān se hijrat nahīñ kar saktā maiñ

itnā tarsāyā gayā mujh ko mohabbat se ki ab

ik mohabbat pe qanā.at nahīñ kar saktā maiñ

apnā īmāñ bhī tujhe sauñp diyā hai ‘anjum’

is se baḌh kar to saḳhāvat nahīñ kar saktā maiñ

Leave a Comment