apne kho.e hue lamhat ko paaya tha kabhi
main ne kuchh vaqt tire saath guzara tha kabhi
aap ko mere ta.aruf ki zarurat kya hai
main vahi huun ki jise aap ne chaha tha kabhi
ab agar ashk umanDte hain to pi jaata huun
hausla aap ke daman ne baḌhaya tha kabhi
ab usi giit ki lai soch rahi hai duniya
main ne jo giit tiri bazm men gaaya tha kabhi
meri ulfat ne kiya ghair ko maa.il varna
main tiri anjuman-e-naz men tanha tha kabhi
kar diya aap ki qurbat ne bahut duur mujhe
aap se buad ka ehsas na itna tha kabhi
dost nadan ho to dushman se bura hota hai
mujh ko apne dil-e-nadan pe bharosa tha kabhi
Leave a Reply