shab-e-va.ada kah ga.i hai shab-e-gham daraz rakhna
ise main bhi raaz rakkhun ise tum bhi raaz rakhna
ye hai ḳhaar ḳhaar vaadi yunhi zaḳhm zaḳhm chalna
ye hai pattharon ki basti yunhi dil-e-gudaz rakhna
hama-tan junun huun phir bhi rahe kuchh to parda-dari
ki bura nahin ḳhirad se koi saz-baz rakhna
mire naḳhun-e-vafa par koi qarz rah na jaa.e
tire dil men jo girah hai use nim-baz rakhna
vahi lai jo an-suni bhi vahi ‘shaz’ naghmagi bhi
ye hisab-e-ḳhamushi bhi mire nai-navaz rakhna
Leave a Reply