Poet
nazuk aisa nahin kisi ka pet
makhmal-e-rang-e-gul hai goya pet
nazar aata hai aks kurti ka
aaine se bhi hai musaffa pet
dard-e-sar kho diya sabihon ka
sandal-e-subh ka hai takhta pet
ye sabahat ye husn ye jalva
varaq-e-sim-mah hai saara pet
naaf hai saghar-e-murad ai gul
bada-e-husn ka hai miina pet
dar yahi hai na chhalke saghar-e-umr
hai mai-e-nab ka qaraba pet
jaam khali nahin hai chehre se kam
aaj saaqi ne muft kaata pet
tum ne dam de ke jab milaya phuul
khuub misl-e-habab phula pet
saikdon nigle aadmi us ne
na bhara azhdar-e-zamin ka pet
surkh kurti se ho gaya maalum
aftab-e-sahar hai un ka pet
dam nahin siine men samata hai
yaad aata hai un ka gora pet
dekhne vaale kyuun na hon majnun
rang men hai ezar-e-laila pet
chhatiyan hain turanj-e-zar goya
lauh-e-simin hai us pari ka pet
laal niifa dikha ke gardun ko
hala-e-mah ka rang laaya pet
shaad hote hain dekh kar ashiq
sahar-e-id ka hai naqsha pet
mu-e-mizhgan hain baal saili ke
aankhon ke samne hai tera pet
baat masti ki hazm ho na saki
shisha-e-bada ka hai halka pet
jan-o-dil se ‘munir’ sadqa hai
nahin dekha hai ab tak aisa pet
Leave a Reply