zehn ho tang to phir shoḳhi-e-afkar na rakh
band tah-ḳhanon men ye daulat-e-bedar na rakh
zaḳhm khana hi jo Thahra to badan tera hai
ḳhauf ka naam magar lazzat-e-azar na rakh
ek hi chiiz ko rahna hai salamat pyare
ab jo sar shanon pe rakkha hai to divar na rakh
ḳhvahishen toḌ na Dalen tire siine ka qafas
itne shah-zor parindon ko giraftar na rakh
ab main chup hun to mujhe apni dalilon se na kaaT
meri TuuTi hui talvar pe talvar na rakh
aaj se dil bhi tire haal men hota hai sharik
le ye hasrat bhi miri chashm-e-gunahgar na rakh
vaqt phir jaane kahan us se mila de tujh ko
is qadar tark-e-mulaqat ka pindar na rakh
Leave a Reply