salib-e-mauja-e-ab-e-hava pe likkha huun
azal se ta-ba-abad harf harf bikhra huun
vajud vahm mira ham-safar raha din bhar
fasil-e-sham se dekha to saaya saaya huun
sameT lenge kisi din nigah mausam ki
shajar shajar pe abhi apna naam likhta huun
chahar samt ghira huun main paniyon men yahan
mira ye karb ki ik Dubta jazira huun
hava ke saath kahan tak uḌaan bharta huun
hudud-e-jism men ik par-kaTa parinda huun
Leave a Reply