azal ki yaad men main garm-e-ah-e-sard hua
lagi thi chot kabhi aur aaj dard hua
guzar gaya ye nigahon se tera markab-e-husn
tamam alam-e-dil ik qadam men gard hua
ghalat ki qabil-e-dar-o-rasan hon ahl-e-havas
bandhai ishq ne himmat jise vo mard hua
pare vo aql se hain is yaqin ne rok liya
kabhi jo vahm ke pichhe men rah-navard hua
tamam tajraba-e-garm-o-sard-e-ishq kahan
kuchh ashk-e-garm hua dil kuchh ah-e-sard hua
naqab un ki uthi thi ki ham hue behosh
nigah un se ladi thi ki dil men dard hua
karam se apne mita do ki be-qarar hai ishq
mira vajud ki duniya ke dil ka dard hua
shuhud-e-be-jihat-o-kaif munsalik ‘raghib’
junun use jo kisi samt rah-navard hua
Leave a Reply